 |
| ស្ពានប្ញស្សី ខេត្តកំពង់ចាម |
ស្ពានប្ញស្សី រឺគេនិយមហៅថា ស្ពានប្រដឺស ស្ថិតនៅខេត្តកំពង់ចាម ជាស្ពានសម្រាប់ឆ្លងកាត់ទន្លេមេគង្គ ពីសង្កាត់វាលវង់ ក្រុងកំពង់ចាម ទៅកាន់ទឹកដីកោះ មានកោះប៉ែន កោះមិត្ត កោះព្រលូង កោះសូទិន ស្ថិតនៅឃុំកោះមិត្ត ស្រុកកំពង់សៀម ។
ស្ពាននេះបានផ្តល់ផលប្រយោជន៍ជាច្រើនសម្រាប់ប្រជាពលរដ្ឋដីកោះ និងដីគោក អាចឆ្លងកាត់ទៅវិញទៅមក និងជាផ្នែកមួយនៃវិស័យទេសចរណ៍ផងដែរ ។
ស្ពាននេះបានផ្តល់ផលប្រយោជន៍ជាច្រើនសម្រាប់ប្រជាពលរដ្ឋដីកោះ និងដីគោក អាចឆ្លងកាត់ទៅវិញទៅមក និងជាផ្នែកមួយនៃវិស័យទេសចរណ៍ផងដែរ ។
ស្ពាននេះមានប្រវែងជិត១ពាន់ម៉ែត្រ កសាងឡើងសម្រាប់ឆ្លងកាត់ទឹកទន្លេមេគង្គតែនៅរដូវប្រាំង ហើយរដូវវស្សាប្រជាពលរដ្ឋធ្វើដំណើរតាមស្ពានបេតុងវិញ ។ ស្ពានប្ញស្សីត្រូវបានបង្កើតឡើងតាំងពីសម័យសង្គមរាស្ត្រនិយមមកម្ល៉េះ ដោយហេតុថាទីតាំងឆ្លងកាត់ពីក្រុងកំពង់ចាមទៅកាន់ដីកោះ គឺអាចឆ្លងកាត់បានតែនៅរដូវវស្សាប៉ុណ្ណោះ រីឯរដូវប្រាំង មានខ្សាច់ដុះច្រើនពេក ធ្វើអោយទូកមិនអាចឆ្លងកាត់បាន ទើបប្រជាជនជំនាន់នោះបង្កើតស្ពាននេះឡើង ។
ស្ពានប្ញស្សី ធ្វើឡើងអំពីប្ញស្សីក្រង ឬត្បាញភ្ជាប់គ្នា ព្រមទាំងមានជន្ទល់ ឬជើងស្ពានយ៉ាងញឹកប្រៀបដូចនឹងជើងក្អែប ហើយចងភ្ជាប់គ្នាដោយខ្សែលួស ។ ស្ពាននេះត្រូវចំណាយប្ញស្សីប្រមាណ ៤ម៉ឺនដើម ហើយប្ញស្សីទាំងនោះ ជារៀងរាល់ឆ្នាំ ម្ចាស់កំពង់ចម្លងត្រូវទិញប្ញស្សីព្រៃពីខេត្តក្រចេះ ដែលចំណាយទឹកប្រាក់ប្រមាណ ៦ម៉ឺនដុល្លាដើម្បីសាងសង់ ។ នៅតាមបណ្តោយស្ពានពេលយប់មានដាក់អំពូលភ្លើងមួយៗ ដើម្បីបំភ្លឺដល់អ្នកធ្វើដំណើរ អាចឆ្លងទៅមករហ័សទាន់ចិត្ត គឺចង់ទៅថ្មើរណា ទៅថ្មើរហ្នឹង ។
នៅរដូវវស្សា ស្ពាននេះត្រូវរុះរើទុកសម្រាប់ប្រើប្រាស់ឆ្នាំក្រោយ តែម្ចាស់កំពង់ចម្លងនៅតែទិញប្ញស្សីប្រមាណ ៣ម៉ឺនដើមទៀតជារៀងរាល់ឆ្នាំ ។ ស្ពាននេះចាប់ផ្តើមធ្វើនៅខែវិច្ឆិកា និងខែធ្នូ ហើយដាក់អោយប្រើប្រាស់នៅខែមករា រហូតដល់ខែមិថុនា ទើបរុះរើចេញ ។
ចំពោះតម្លៃឆ្លងកាត់ស្ពានមួយលើកសម្រាប់មនុស្សម្នាក់ ៤០០រៀល កង់១គ្រឿង ២០០រៀល ម៉ូតូ១គ្រឿង ៥០០រៀល រទេះសេះ និងសេះ ២០០០រៀល រថយន្តធុនមធ្យម ១ម៉ឺនរៀល រថយន្តធុនតូច ៦០០០រៀល ។ ចំណែកមន្ត្រីរាជការ និងសិស្សសាលាមិនយកតម្លៃមនុស្សឆ្លងកាត់ទេ ប៉ុន្តែត្រូវបង់ថ្លៃកង់ ឬម៉ូតូក្នុងពេលធ្វើដំណើរម្តងៗ ។
ជារៀងរាល់ថ្ងៃ ប្រជាពលរដ្ឋនៅដីគោក និងដីកោះ តែងធ្វើដំណើរឆ្លងកាត់ស្ពានប្ញស្សីទៅមក រួមមានសិស្សសាលាមករៀននៅក្រុងកំពង់ចាម អ្នកភូមិដឹកកសិផលដូចជា ថ្នាំជក់ ពោត ល្ង និងផ្លែឈើហូបផ្លែមកលក់នៅក្រុងកំពង់ចាម ។
0 Komentar