វត្តធម្មវ័ន ហៅវត្តភ្នំក្រាំងដីមាស ជាវត្តស្ថិតនៅចង្កេះភ្នំ ស្ថិតនៅក្នុងភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង លាតសន្ធឹងតាមបណ្តោយផ្លូវជាតិលេខ៥ ក្នុងទិសដៅពីក្រុងកំពង់ឆ្នាំង ទៅខេត្តពោធិ៍សាត់ លើផ្ទៃដីប្រមាណ ២៨៨ហិចតា មានចម្ងាយប្រមាណ២គ.ម ពីក្រុងកំពង់ឆ្នាំង ។
ភ្ញៀវទេសចរណ៍ជាតិ និងអន្តរជាតិ ទៅទស្សនារមណីយដ្ឋាននេះជារៀងរាល់ថ្ងៃ ដោយឡើងតាមផ្លូវបេតុងទៅលើកំពូលភ្នំ ។ នៅលើកំពូលភ្នំ ភ្ញៀវទេសចរណ៍នឹងបានឃើញ និងទស្សនាវត្តធម្មវ័ន ដែលជាទីនិយមសម្រាប់ពុទ្ធបរិស័ទជិតឆ្ងាយ និងភ្ញៀវទេសចរយ៉ាងច្រើនកុះករ ។
ក្រៅពីវត្ត ភ្ញៀវទេសចរណ៍នឹងអាចទស្សនាភ្នំនាងកង្រី វាលស្រែពណ៌បៃតងស្រស់ ដើមត្នោត ផ្ទៃទឹកទន្លេសាប ភូមិឋានប្រជាពលរដ្ឋក្នុងក្រុងកំពង់ឆ្នាំង និងស្រុករលាប្អៀរ ពីលើកំពូលភ្នំ ។ បន្ថែមពីនេះ ភ្ញៀវទេសចរណ៍អាចជិះកង់កម្សាន្ត គយគន់ទេសភាពតាមដងភ្នំក្រាំងដីមាស ទិញវត្ថុអនុស្សាវរីយ៍ និងទស្សនាការផលិតវត្ថុអនុស្សាវរីយ៍ផ្សេងៗផលិតពីដីឥដ្ឋ នៅភូមិអណ្តូងប្ញស្សី ឃុំស្រែថ្មី ស្រុករលាប្អៀរ ខេត្តកំពង់ឆ្នាំង ។ ក្រៅពីនោះ នៅភូមិទ្រា ឃុំស្រែថ្មី ស្រុករលាប្អៀរ ខេត្តកំពង់ឆ្នាំង យើងក៏អាចទស្សនាប្រជាពលរដ្ឋឡើងត្នោត ដើម្បីយកទឹកត្នោតរម្ងាស់ធ្វើជាស្ករ ឬល្ងូ ។
ប្រវត្តិឈ្មោះភ្នំក្រាំងដីមាស
ពីដើមអ្នកស្រុកតែងតែយកដីឥដ្ឋមកសូនជា ក្អមឆ្នាំង នៅភ្នំនេះ ដោយហេតុថាដីល្បាយនៅទីនេះ មានកម្ទេចលោហៈពណ៌មាសភ្លឺផ្លេកៗ ពោលគឺមានកម្ទេចមាសស្រួយ កប់នៅក្នុងនោះ បើតាមពាក្យគីមី គឺ ដែកស៊ុលហ្វាត FeS2 ទើបអ្នកស្រុកហៅថាដីមាស ។
មើលរូបជាច្រើន ចុចទីនេះ
សូមទស្សនាវីដេអូនៃវត្តធម្មវ័ន
0 Komentar